【農曆新年親戚問題全攻略】準備好答親戚問題未？13條煩膠問題全破解！ | GOODEAL 早早鳥 - Grab Your Coupons & Discounts

就嚟農曆新年，同親戚拜年嗰陣，最頭痕嘅就係重複又重複嘅「煩膠」問題。之所以話係煩膠，係因為親戚未必真係關心你，而係為咗過口癮、攝時間，冇嘢揾嘢嚟講。其實，親戚唔一定想做「煩膠」，而係過年過節，大家聚埋一齊，無謂dead air，大家有講有笑，keep住新年喜氣洋洋嘅氣氛。

姑勿論親戚嘅出發點係咪真心，喺新年咁喜慶嘅節日，無謂破壞氣氛，影響大家嘅心情，總要同親戚打下牙骹，禮貌回答佢哋嘅問題。通常親戚例必問到嘅係學業、工作、感情狀況相關嘅問題。點樣一來一往回答得頭頭是道呢？呢次GOODEAL就準備咗幾個例行問題嘅答案，供大家參考，歡迎任意使用。

學業成績問題

1. 問：你上次考成點呀？

• hea答：ok啦～咪又係咁，同以前差唔多囉。
• 認真答：多謝關心，成績還可以，要再繼續努力。
• 反客為主答：我嘅成績進步咗唔少，係咪利利事事呢～（攤手）

2. 問：阿邊個邊個今次考第一，咁你又點呢？

• hea答：隨緣啦～盡咗最大努力，搏盡無悔。
• 認真答：我冇佢咁醒目，今次差咗少少，要繼續努力讀書先得。
• 陰陽怪氣答：恭喜晒呀～第一唔易keep，祝佢好運下次又考第一。

3. 今年就要考DSE，你準備成點/有冇信心升讀大學？

• hea答：準備就有嘅，信心就唔一定有。盡人事，聽天命。
• 認真答：我有補習tips，學校老師都好俾心機教，我日日都努力讀書，期望考到好成績讀到XX大學。
• 迴避問題答：多謝關心，最近學業壓力好大，一諗起DSE就好焦慮好頭痛，不如唔好再講呢個話題。

4. 你大學讀咩系？將來想做咩工/入邊行？

• hea答：我想揾份穩定嘅好工，人工唔使好高，夠用就ok。
• 認真答：我讀嘅學系多數人將來從事XX行業，人工唔錯福利好，我都打算入呢行。
• 熱血青春答：當初我為咗興趣揀呢個學系，就冇諗過發達。雖然我讀嘅嘢揾唔到咩大錢，出到嚟相關工種都比較低人工，但我學到好多嘢，同老師同學關係好好，讀得好開心好滿足。

工作就業問題

5. 你揾到工未？

• hea答：未呀～邊有咁快，嚟緊仲有interview，唔知會唔會成功呢。
• 認真答：暫時未揾到，依家我日日睇招聘網頁，send求職信，希望有offer啦～
• 堅持追夢答：仲未想出嚟做嘢住，依家同friend做緊創意媒體嘅plan。雖然唔賺錢，但呢個係我哋嘅夢想，依家唔做，將來就冇機會做。

6. 你依家返咩工/做邊行？

• hea答：同上年一樣，冇乜特別。
• 認真答：返緊XX工，我幾鍾意呢份工，好有成就感。而且工作穩定，收入仲過得去啦。你呢？咩環境呀？
• 以退為進答：依家市道差，我嗰行嘅環境唔多掂。我諗住轉工，你哋有冇好路數？

7. 你揾幾錢/收入幾多呀？

• hea答：人工過得去啦，賺嘅錢足夠生活，多謝關心～
• 認真答：我嘅人工算係咁啦，喺我嗰行衰唔到去邊，收入above average。咁你個仔/女呢？做邊行，咩收入？
• 乘機吐苦水答：我嗰行環境差，份工都就嚟保唔住，考慮係咪轉行，但隔行如隔山，邊有咁容易呀？我同你講呀……（下省一萬字苦水）

8. 你今年有冇加人工/升職？

• hea答：有呀，加咗少少咁囉。
• 認真答：冇呀，不過我好鍾意呢份工，要更加努力先得，嚟緊呢一年再搏殺，爭取升職嘅機會。
• 答非所問答：有冇都好啦，我呢一年做咗好多嘢，為公司出咗好多力，負責一個大project，成team人都好有heart，可惜出到嚟嘅成果未如理想，不過我從中學到好多嘢，吸取呢個經驗教訓，將來做得更好。

感情生活問題

9. 有冇拍拖呀？

• hea答：鍾意自己一個人，多個人多摩擦，單身冇咁多煩惱，之後再諗拍拖嘅嘢。
• 認真答：依家係事業搏殺期，等工作穩定落嚟先打算/依家仲讀緊書，專注學業，日日都有好多paper要睇要寫，冇時間拍拖。
• 轉移話題答：我未有打算呀/未追到人，你個仔女又咩情況，有冇拍拖？

10. 你仲未有男/女朋友？快啲識多個啦～時間唔等人？

• hea答：係呀，感情嘅嘢隨緣啦～命裡有時終須有，命裡無時莫強求～
• 認真答：仲未遇到合適嘅人，寧缺勿濫，如果遇到心儀嘅對象，我一定去馬！
• 順水推舟答：我都想拍拖，不過身邊嘅人都名花/草有主，你有冇好對象介紹俾我識？

11. 你哋拍咗咁多年拖，幾時結婚請飲呀？/你都差唔多三十歲，仲唔快啲結婚？

• hea答：結婚又冇限定係幾時，我哋感情穩定，生活過得去，幾滿意依家嘅生活。
• 認真答：人生又唔一定要結婚，最緊要係有錢在手，依家專注工作揾真銀，大把嘢頭痕，仲邊有時間諗結婚嘅嘢？
• 轉移話題答：時代唔同咗，我哋呢代人唔洗咁早結婚。你同XX（配偶）幾時結婚？相差幾多歲？點解會咁早結婚嘅？

12. 你哋結咗婚咁耐，仲唔生小朋友？

• hea答：冇錢養，不了。
• 認真答：我哋想享受二人世界，等多兩三年先考慮生小朋友。
• 曉以利害答：依家香港嘅環境唔適合生小朋友，等我哋移咗民先諗生唔生嘅問題。

13. 你哋生得一個點得㗎/唔考慮生多個小朋友？一男一女湊個「好」字嘛！

• hea答：生多個好揼本，係咪你養先？
• 認真答：一個就夠晒喇，如果仲生多個就keep唔到依家每年去幾次旅行嘅生活質素。
• 仔女擋箭牌答：我問過XX（仔女名），佢話唔鍾意多個細佬妹嚟爭寵，唔想我哋再生。